Редакција

Изложба на фотографии на Димитар Апостолов со наслов “After” ќе биде отворена на 5 април во 21:30 часот во Кафе МКЦ.

На отварањето музички перформанс ќе имаат: Сашко Костов, Игор Стојановски и Сецко Сеад Хаџиќ, а Теа Шалдева ќе настапи со Dj сет.

Изложбата ќе биде отворена до 14 април.

„Тој е необична појава во македонската фотографија.
Димитар Апостолов, чиниш, најпријатно се чувствува во фотографскиот андерграунд, а всушност, подолго време е присутен на фотографската сцена кај нас. Кога најмалку очекуваш, тој се појавува од дупката таков каков што е, директен и суров, но исто време емотивен и искрен. Додека мнозина ги фотографираат нивните животи, тој ги живее своите фотографии.
Клаустрофобичната атмосфера набиена со еротика и алкохол на прв поглед навестува помешани чувства кај гледачот. Тоа чувство трае кратко. Гледачот сфаќа дека не е навикнат некој така брутално да го бранува фотографскиот жабурник во Македонија. По некое време тој (гледачот), е свесен дека пред себе има еден артикулиран фотограф, кој што вешто владее со техниката, но уште подобро го користи јазикот на фотографијата и директно стрела во целта.
На гладната публика Димитар со своите фотографии и удира шлаканица в лице. Кога ги гледате неговите фотографии (кои што сакате да ги гледате долго…), имате чувство дека од некој ќош Ве гледаат Чарлс Буковски, Енди Ворхол и Тери Ричардсон… А, тоа е всушност Димитар Апостолов. Таков каков што е.“ – за него ќе рече Драги Неделчевски.

Проект платформата за развој на креативните индустрии „СКОПЈЕ КРЕАТИВА“, во соработка со регионалната платформа за активизам „ЛИЦЕ В ЛИЦЕ“, организираат тридневна работилница за фотографија насловена „Една фотографија – илјада зборови“, наменета за креативци до 25 години.

Работилницата ќе се одржи од 5 до 7 април во Младинскиот културен центар во Скопје. Младите креативци ќе имаат можност од професионалниот фотограф Томислав Георгиев да ги научат вештините на уметничкото творење преку фотографија и тоа на теми како што се: демаргинализација, екологија и активизам.

-Намерата е кај младите да се разбуди и освести потребата за општествена одговорност преку уметноста. Добрата фотографија доловува цела приказна, но важен е приодот. И предрасудите можат да се прочитаат во неа доколку авторот не расчистил со нив. Работилницата има двојна улога- усовршување техники, композиција, кадар, план, но и поттикнување младите креативци да го изразат својот став за реалноста – нагласи Климентина Илијевски, координатор на регионалната платформа за активизам, за Македонија.

Услов за учество во оваа работилница е пријавените кандидати да имаат сопствен фотоапарат.

Најуспешните дела ќе бидат објавени во уличното активистичко списание „Лице в лице“, а ќе имаат и можност да учествуваат на јавниот повик за избор на најдобра фотографија кој што ќе го објави проект платформата за развој на креативните индустрии „Скопје креатива“.

Најдобрите фотографии кои што ќе ги селектира стручна комисија ќе бидат презентирани на изложба во „Галерија 8“, а три од нив ќе бидат наградени од „Никон“.

Биографиите и кусите мотивациони писма на кандидатите се очекуваат на licevlice@cma.mk, најдоцна до 3.април 2013 година.

Конечната листа на избрани кандидати за учество ќе биде објавена на 4. април.

На 25ти март со почеток во 18.00 часот, во просториите на ФКК Козјак свое излагање ќе има претседателот на фотографската асоцијација УПИ (UPI http://www.upiphoto.com ), Мецакис Манолис на следниве точки: Повеќе »