Вести

Фотографска изложба „Охрид во 36 слики“ на охриѓанецот Мишо Јузмески пред битолчани

Во сабота на 13-ти Април, во 20.00 часот во Горното фоаје при Центарот за култура – Битола свечено ќе се отвори фотографска изложба со наслов „Охрид во 36 слики“ од охриѓанецот Мишо Јузмески, во организација на Фото Кино Клуб Битола, галерија „Култура 365“ од Охрид и Центар за култура – Битола.

Тематска изложба на фотографии од Охрид, односно оние делови од Охрид, моменти и сегменти од секојдневното живеење на градот кои не се клиширани, а се невообичаени, она што не го гледаат и не можат да го доловат туристите кога доаѓаат во Охрид. Авторот ни ја нуди убавината на овој наш бисер преку фотографии кои се сведоштво на малите, незабележливи, но значајни места во Охрид.
Изложбата ќе биде отворена до 20 април.

Фото кино клуб КОЗЈАК од Куманово срдечно Ве поканува на свеченото отворање на меѓународната изложба на уметничка фотографија STREETS 2013, односно УЛИЦИ 2013. Свеченото отворање ќе се одржи на18 април 2013 година во 20 часот во НУЦК Трајко Прокопиев – Куманово.

На втората меѓународна изложба на уметничка фотографија УЛИЦИ 2013, организаторот ФКК Козјак изброи дури 7402 пристигнати фотографии од 733 автори од 70 земји. Сите пристигнати фотографии се со специјални културни карактеристики кои ја направија изложбата со висок артистички квалитет.По завршеното жирирање на УЛИЦИ 2013 жирито во состав Манолис Метзакис, Серкан Турац и Душко Јовановски прими 786 фотографии во темата СЛОБОДНА, 878 фотографија во темата УЛИЦИ и 639 фотографии во темата ПРИРОДА.

Уште еднаш ве покануваме да го посетите свеченото отворање на 18 април (четврто) во 20 часот и заедно да ја проследиме поставката на наградените и најдобрите пристигнати фотографии. 

Патувачка изложба на фотографии од „ National Geographic “ денеска во 13 часот ќе биде отворена во Куршумли ан.

Постановката ја сочинуваат 60 фотографии објавени на порталот за Западен Балкан на „ National Geographic “.

Изложбата првпат е поставена во Вашингтон, САД, во јуни, минатата година со цел промовирање на јавното пуштање на порталот, чија цел е да го поттикне регионалниот туризам и да помогне во формирање силна мрежа за разработка на разни иницијативи од регионот.

Земји-учеснички, односно членови на Советот за геотуризам се Македонија, Албанија, Косово, Србија, Босна и Херцеговина и Црна Гора. Од Скопје изложбата ќе продолжи низ Балканот и Европа.

Фото кино клубот Козјак од Куманово изминатата недела имаше за чест да биде домаќин на г. Манолис Метсакис, кој всушност е претседател на светската фотографска организација УПИ (http://www.upiphoto.com) и претседател на најголемиот фото клуб во Грција (Ираклион). Неколку-дневното дружење кое беше исполнето со долги разговори, резултира со размена на многу ставови и искуства, како за творечки и излагачки, така и за организациски активности.

Претпоследниот ден од неговиот престој во Куманово, г. Манолис пред членовите на ФКК Козјак имаше дигитална презентација на своето фотографско творештво, по што следеше дискусија на темата композиција во модерната уметничка фотографија. Следуваше кратка презентација на целите и задачите на светската фотографска организација УПИ, а вечерта се заврши со презентација и дискусија на колекциите фотографии со кои реномирани автори изминатата година освоија УПИ звања.

Почитувани члленови на ФСМ, на состанокот на уметничкиот совет на ФСМ, фотографии кои се избрани да ја сочинуваат националната колекција за 27-мото FIAP биенале (27th FIAP Biennial for projected images) во организација на фотографската асоцијација на Луксембург.

Ова се избраните дела:

Изложба на фотографии на Димитар Апостолов со наслов “After” ќе биде отворена на 5 април во 21:30 часот во Кафе МКЦ.

На отварањето музички перформанс ќе имаат: Сашко Костов, Игор Стојановски и Сецко Сеад Хаџиќ, а Теа Шалдева ќе настапи со Dj сет.

Изложбата ќе биде отворена до 14 април.

„Тој е необична појава во македонската фотографија.
Димитар Апостолов, чиниш, најпријатно се чувствува во фотографскиот андерграунд, а всушност, подолго време е присутен на фотографската сцена кај нас. Кога најмалку очекуваш, тој се појавува од дупката таков каков што е, директен и суров, но исто време емотивен и искрен. Додека мнозина ги фотографираат нивните животи, тој ги живее своите фотографии.
Клаустрофобичната атмосфера набиена со еротика и алкохол на прв поглед навестува помешани чувства кај гледачот. Тоа чувство трае кратко. Гледачот сфаќа дека не е навикнат некој така брутално да го бранува фотографскиот жабурник во Македонија. По некое време тој (гледачот), е свесен дека пред себе има еден артикулиран фотограф, кој што вешто владее со техниката, но уште подобро го користи јазикот на фотографијата и директно стрела во целта.
На гладната публика Димитар со своите фотографии и удира шлаканица в лице. Кога ги гледате неговите фотографии (кои што сакате да ги гледате долго…), имате чувство дека од некој ќош Ве гледаат Чарлс Буковски, Енди Ворхол и Тери Ричардсон… А, тоа е всушност Димитар Апостолов. Таков каков што е.“ – за него ќе рече Драги Неделчевски.